`n Meditatiewe hulpmiddel wat jy kan gebruik om jou
te help om iets van Groot Lydensweek te beleef, oor dit na te dink en deel te
maak van jou eie lewe.
Beste
lidmaat,
Die
doel van hierdie boekie is om jou te begelei om iets van die lydensweg wat
Jesus gestap het, te beleef. Jesus het hierdie lydensweg gestap sodat ek en jy
lewe, en dit in oorvloed kan hê. Natuurlik kan `n mens nie aan Jesus se
lydensweg, kruisiging en dood los van die leë graf (opstanding van Jesus) dink
nie, maar ek wil jou graag uitnooi om dag – vir – dag by `n spesifieke
teksgedeelte wat iets van Jesus se lyding uitlig, stil te staan en nie dadelik
aan Jesus se opstanding te dink nie wanneer jy die teksgedeeltes lees.
Hierdie
boekie is `n meditatiewe hulpmiddel
(saamgestel met behulp van verskeie bronne en materiaal wat ek self geskryf
het). Gee jouself genoeg tyd om stil te word, `n teksgedeelte te lees (en weer
te lees) en om deur middel van `n simboliese handeling iets sintuiglik van die teks te beleef. Let wel dat hierdie
meditatiewe hulpmiddel nie presies kronologies Jesus se laaste paar dae op
aarde volg nie. Ek het eerder sekere verhale of gebeure, wat iets van Jesus se
lydensweg in herinnering roep, gekies.
Jy
gaan die geleenheid kry om jou eie Paasfees uitstalling te maak. Jy kan hierdie
uitstalling iewers in jou tuin of jou huis maak. Jy is welkom om aan die einde
van die week `n foto van dit te neem en aan my via Whatsapp te stuur – ek wil
graag die fotos op sosiale media plaas (ek sal nie jou naam/name by sit nie).
Jy is welkom om hierdie hulpmiddel individueel of saam as `n gesin te gebruik.
Kyk
eerlik, biddend na jou pyn, stryd, swakhede, twyfel en sonde. Bring dit in die teenwoordigheid
van die Lydende Lam. Hy het gely en is versoek – weet dat Hy by jou is in elke
stuk swakheid, lyding en versoeking wat jy moet deurgaan.
Ons
is tans in `n tyd van inperking waarin ek persoonlik net weer besef ons as
mense is nie so in beheer soos wat ons dink ons is nie. Mag jy in hierdie tyd
van inperking waarin ons elkeen (al is jy deel van die essensiële dienste)
anders leef, anders dink en anders optree op `n besondere manier iets van die
Here se teenwoordigheid beleef. Mag jy, al is jy hoe bekend met die verhale van
Jesus se lydensweg, ook opnuut aangegryp en aangeraak word deur Jesus se
lyding.
Mag die Here jou
reis gedurende hierdie groot Lydensweek seën! Ds. Corné Randall
Groot Lydensweek
2020
SONDAG
5 APRIL
DIE INTOG VAN JESUS IN JERUSALEM (PALMSONDAG)
Lees Matteus 21:1-11
Toe hulle naby
Jerusalem kom en Betfage aan die Olyfberg bereik, het Jesus twee dissipels
vooruit gestuur
en vir hulle gesê:
“Gaan na die dorpie daar reg voor julle, en net soos julle inkom, sal julle
daar ʼn donkie kry wat vasgemaak is, en ʼn vul by haar. Maak haar los en bring
hulle vir My.
En as iemand vir
julle iets daaroor sê, antwoord dan: Die Here het hulle nodig, en Hy sal hulle
gou weer terugstuur.”
Dit het gebeur sodat
die uitspraak van die profeet vervul sou word:
“Sê vir Sion: Kyk,
jou Koning kom na jou toe; Hy is nederig en Hy ry op ʼn donkie, op die vul van ʼn pakdier.”
Die twee dissipels
het toe vooruit gegaan en gedoen wat Jesus hulle beveel het.
Hulle het die donkie
en die vul gebring, van hulle klere op die diere gesit, en Jesus het opgeklim.
Die grootste deel
van die skare het van hulle klere op die pad oopgegooi, en ander het takkies
van die bome afgebreek en dit op die pad gestrooi.
Die mense wat voor
Jesus geloop het en dié wat agter Hom aan gekom het, het begin uitroep: “Prys
die Seun van Dawid! Loof Hom wat in die Naam van die Here kom! Prys Hom in die
hoogste hemel.”
Toe Jesus in
Jerusalem ingaan, het die hele stad in beroering gekom en gevra: “Wie is hierdie man?”
Die skare het
geantwoord: “Dit is die profeet Jesus van Nasaret in Galilea!”
Beleef nou die
verhaal
So
het dié Sondag aangebreek, die eerste dag van die Pasgaweek, die eerste dag van
die laaste week van Jesus se aardse lewe, die dag van Sy feestelike intog in
Jerusalem.
Die
skare verwelkom Jesus soos ‘n koning in Jerusalem met liedere, klere en palmtakke
op die pad – maar tog verstaan hulle nie werklik wie Hy is nie; of wat Hy kom
doen het nie. In Lukas 19:41 en 42 vermeld Lukas dat Jesus gehuil het toe Hy
nader aan die stad gekom het en dat Hy gesê het: “As jy vandag tog wou insien
wat vir jou vrede nodig is! Maar nou is jy blind daarvoor”. Alhoewel die skare
Jesus loof en prys, besef hulle nie werklik wie Hy is of wat Hy kom doen nie,
want hulle dink onder andere nogsteeds aan politieke verlossing en nie ware
blywende vrede tussen God en mens – juis die vrede wat Jesus bring.
Op
die vraag: “Wie is hierdie man?”, antwoord die skare: “Dit is die profeet Jesus
van Nasaret in Galilea” (Mat 21:11).
As
iemand vir jou moet vra: “Wie is hierdie man?”, wat sal jy antwoord?
Betree nou die verhaal
Kry
vir jou `n palmtak (of enige ander tak) wat jy vir jou Paasfees – uitstalling
gaan gebruik. Kies `n plek (in jou tuin of huis) waar jy jou Paasfees –
uitstalling kan doen (dit moet `n plek wees waar jy gereeld tyd spandeer sodat
jy dikwels na die Paasfees – uitstalling gedurende die tyd kan kyk).
Wanneer
jy die tak neersit bely die volgende woorde in jou hart:
“Here
Jesus, U is die Pasga-lam wat vir my gesterf het, U is my Koning wat vrede
tussen my en U gebring het, U is my Redder”. Ek eer U.
Gebed…Lees Psalm 24:7-10
biddend.
Verbly julle, poorte, wees bly, eeue-oue deure, want
die magtige Koning wil ingaan! Wie is hierdie magtige Koning? Die Here, sterk
en geweldig, die Here, oorwinnaar in elke stryd. Verbly julle, poorte, wees
bly, eeue- oue deure, want die magtige Koning wil ingaan! Wie is Hy, hierdie
magtige Koning? Die Here, die Almagtige, Hy is die magtige Koning.
MAANDAG 6
APRIL JESUS WORD GESALF
Lees Matteus 26:6-13
Terwyl Jesus in
Betanië in die huis van Simon die melaatse aan tafel was,
het ʼn vrou by Jesus
gekom met ʼn albaste fles baie kosbare reukolie en dit op sy kop uitgegiet.
Toe die dissipels
dit sien, was hulle verontwaardig. “Waarom so ʼn verkwisting?” vra hulle.
“ʼn Mens kon die
reukolie vir baie geld verkoop het en dit vir armes gegee het.”
Jesus het dit gemerk
en vir hulle gesê: “Waarom maak julle dit vir
die vrou moeilik? Sy het ʼn goeie daad aan My
gedoen.
Die armes het julle
altyd by julle, maar vir My het julle nie altyd nie.
Deur hierdie
reukolie op my liggaam uit te giet, het sy My voorberei vir my begrafnis.
Dit verseker Ek
julle: Oral waar hierdie evangelie in die hele wêreld verkondig word, sal daar
ook vertel word wat sy gedoen het, tot ʼn herinnering aan haar.”
Beleef nou die verhaal
Dit
is opmerklik om raak te sien dat `n verhaal van die salwing in al die ander
Evangelies ook voorkom (Matteus 26:6-13, Lukas 7: 36-50 en Johannes 12:1-8).
Die salwingsverhale in Markus en Matteus stem baie ooreen, terwyl Lukas se
verhaal aansienlik van Markus en Matteus se verhale verskil. Johannes se verhaal
stem hoofsaaklik ooreen met Matteus en Markus se verhaal, hoewel hy ook
elemente van die Lukas – weergawe bevat (soos onder andere dat Jesus se voete
gesalf is, asook die feit dat die vrou haar hare gebruik om dit af te droog).
Met die uitsondering van Lukas, kom dié verhaal by al drie Evangelies aan die
begin van hulle verhale rondom die lydens- en paasgebeure voor.
Anders
as die dissipels sê Jesus dat hierdie vrou `n goeie daad gedoen het (Matteus
26:16). Sy tree met `n stuk deernis teenoor Jesus op – sy gee van haarself, sy
tree met liefde teenoor Jesus op.
Betree nou die
verhaal
Vir
die volgende simboliese handeling benodig jy `n klein bietjie olie en enige
grootte kruis (jy kan ook self `n kruis van takke maak as jy lus is). Plaas die
kruis by jou Paasfees – uitstalling. Neem nou die olie en gooi ’n paar druppels
olie by die voet van die kruis uit. Wanneer jy van die olie uitgooi bely jy die
volgende woorde in jou hart:
“Here
Jesus U is my God en Koning”.
Gebed…lees Psalm 104:1-4
biddend
Ek wil die Here
loof!
Here my God, U is
baie groot,
U is beklee met
koninklike luister, U is met ‘n kleed van lig omhul.
Dit is U wat die
hemelkoepel soos ‘n tentdoek gespan en vir U ‘n woonplek ingerig het oor die
waters daarbo, U wat op die wolke ry,
op die vleuels
van die wind,
U wat die winde u
boodskappers maak, die weerligte u dienaars,
U wat die aarde
stewig gevestig het, sodat dit nooit sal wankel nie.
DINSDAG 7
APRIL PETRUS VERLOËN JESUS
Lees Lukas 22:54-62
Hulle het Jesus toe
gevange geneem en Hom weggelei en in die huis van die hoëpriester gebring.
Petrus het op ‘n afstand agterna gekom.
In die middel van
die binneplaas was daar ‘n vuur, en daar het mense by mekaar gesit. Petrus het
tussen hulle gaan sit.
‘n Diensmeisie wat
hom in die skynsel van die vuur sien sit het, het hom goed bekyk en gesê: “Dié
een was ook saam met daardie man”.
Maar Petrus het dit
ontken deur te sê: “Juffrou, ek ken Hom nie!”
‘n Rukkie later sien
iemand anders hom en sê: “Jy is mos ook een van hulle”. Maar Petrus antwoord:
“Man, ek is nie!”
Na verloop van sowat
‘n uur het nog een met beslistheid beweer: “Sowaar, dié een was ook saam met
daardie man. Hy is mos ook ‘n Galileër!”
Maar Petrus sê:
“Man, ek weet nie waarvan jy praat nie!” En onmiddellik, terwyl hy nog praat,
het daar ‘n haan gekraai.
Die Here het
omgedraai en Petrus aangekyk. Toe val dit Petrus by wat die Here vir hom gesê
het: “Voordat die haan vannag kraai, sal jy My drie maal verloën”.
En Petrus het
buitentoe gegaan en bitterlik gehuil.
Beleef nou die verhaal
As
`n mens so deur die Evangelies blaai, lees `n mens nogal baie Petrus se naam
raak. Wanneer ek aan die dissipel Petrus dink is daar `n woord wat sommer
dadelik in my kop opkom: PASSIEVOL.
Petrus
wie Jesus se genesingswerke eerstehands ondervind het toe Jesus Petrus se
skoonma gesond gemaak het. Petrus wie bely: “U is die Christus, die Seun van
die lewende God. Ja daardie dissipel wie nie bang is nie en met passie sê: “Al
sal hulle U ook almal in die steek laat, ék sal U nooit in die steek laat
nie…Al moet ek saam met U sterwe, ek sal U beslis nie verloën nie!” (Matteus
26:33, 35).
En tog faal
Petrus. Hy verloën Jesus drie maal.
Lukas
noem dat Jesus omgedraai en Petrus aangekyk het nadat Petrus hom verloën het
(Lukas 22:61).Wat dink jy het Petrus in Jesus se oë gelees toe Jesus omgedraai
het en vir hom gekyk het?
Was daar vergifnis
vir Petrus se verloëning Jesus verseker Petrus dat Hy die rots is waarop Jesus
die kerk sal bou. Die Here het Petrus heeltemal vergewe. Dink jy Petrus het
homself vergewe?
Betree nou die
verhaal
Almal
van ons het al Petrus-oomblikke gehad. Tye wanneer
ons die Here verloën het. Geleenthede toe ons stil gebly het, toe ons moes
gepraat het. Oomblikke waaroor ons skaam is. Dinge wat ons eerder wil wegsteek
as ontbloot.
Dink
vir ’n oomblik na oor jou eie Petrus-oomblikke.
Neem
nou ’n papier en pen. Skryf ’n brief/’n paar woorde of teken ’n prent wat jou
Petrus-oomblik/ke verteenwoordig. Vou jou papier op en plaas dit iewers waar jy
dit maklik weer kan kry (jy gaan dit later in die week by jou Paasfees –
uitstalling sit).
Word
vir ‘n paar oomblikke stil en reflekteer oor dit wat jy geskryf of geteken het.
WOENSDAG
8 APRIL
`N KROON EN `N KLEED
Lees Johannes 19:1-16.
Toe het Pilatus vir
Jesus geneem en Hom laat gésel.
Die soldate het ‘n
doringkroon gevleg en dit op sy kop gesit.
Hulle het vir Hom ‘n pers mantel aangetrek
en herhaaldelik
nader na Hom toe gekom en gesê: “Ons groet u, Koning van die Jode!”
En elke keer het hulle Hom geklap.
Pilatus het toe weer
buitentoe gekom en vir die Jode gesê: “Kyk, ek bring hom vir julle
buitentoe, sodat julle kan weet dat ek geen skuld in hom vind nie.”
Toe het Jesus
buitentoe gekom, nog so met die doringkroon op en die pers mantel aan. Pilatus
sê toe vir hulle: “Dit is die mens!”
Toe die
priesterhoofde en die wagte Hom sien, skreeu hulle: “Kruisig hom! Kruisig hom!”
“Vat júlle hom en kruisig hom,” sê Pilatus
daarop vir hulle, “want ék vind geen skuld in hom nie.”
Die Jode sê toe vir
hom: “Ons het ‘n wet, en volgens dié wet moet hy dood, omdat hy hom as die
Seun van God voorgedoen het.”
Toe Pilatus dit
hoor, het hy nog banger geword. 9 Hy het weer in sy ampswoning ingegaan en vir
Jesus gevra: “Waar kom jy vandaan?”Jesus het hom egter nie geantwoord nie.
Pilatus sê toe vir
Hom: “Praat jy nie met my nie? Weet jy nie dat ek die mag het om jou los
te laat en ook die mag om jou te kruisig nie?”
En Jesus antwoord hom:
“U sou geen gesag oor My gehad het as dit nie van Bo aan u gegee was nie.
Daarom het hy wat My aan u uitgelewer het, groter skuld.”
Hieroor het Pilatus
probeer om Hom los te laat; maar die Jode het geskreeu: “As u hom loslaat,
is u nie ‘n vriend van die keiser nie. Elkeen wat homself as koning voordoen,
is in verset teen die keiser.”
Toe Pilatus dit
alles hoor, het hy vir Jesus buitentoe gebring en op die regbank gaan sit op
die plek wat Klipterras genoem word, in Hebreeus Gabbata.
Dit was die
voorbereiding vir die paasfees, en dit was omtrent sesuur die môre. Hy sê toe
vir die Jode: “Hier is julle koning!”
Maar hulle skreeu:
“Vat hom weg! Vat hom weg! Kruisig hom!” Toe vra Pilatus vir hulle:
“Moet ek julle koning kruisig?”
Die
priesterhoofde antwoord: “Ons het nie ‘n koning nie; ons het net die
keiser.”
Toe het hy Hom op
hulle versoek oorgelewer om gekruisig te word, en hulle het Jesus weggeneem.
Beleef nou die verhaal
In
hierdie verhaal is daar `n klomp verskillende karakters en groepe mense wat `n
klomp verskillende dinge sê. Een manier om `n teks te lees is om spesifiek te
fokus op die dialoog/direkte woorde wat in `n teks voorkom – om te let op wie
wat sê en ook te let op wat nie gesê word nie. Dikwels hoor `n mens dan `n teks
op `n ander manier .
Lees die teks weer deur en let spesifiek op na die
dialoog/woorde wat in hierdie teks voorkom.
Lees die teks weer deur en gebruik verskillende
kleure om verskillende persone en groepe se woorde uit te lig. Gebruik
byvoorbeeld blou vir Pilatus, pers vir Jesus en verskillende kleure vir
verskillende groepe mense se woorde.
Wie praat die meeste
in die teks?
Wie praat die minste
in die teks?
Is daar dalk iets
wat jy nuut/anders hoor of sien uit die teks op grond van die woorde wat
gebruik word?
Betree die verhaal
Maak `n
doringkroon wat jy by jou Paasfees – uitstalling kan sit. Jy kan byvoorbeeld `n
doringkroon van papier maak (volg die skakel na `n video wat jou wys hoe om dit
te doen https://youtu.be/_-6DKIZvoSo).
Gebed…lees Liedboek 389
biddend.
Is dit, is dit my
Koning – kyk daar, aanskou die Mens!
Is dit, is dit sy
kroning – wie het dit so gewens?
Is dit sy
koningshulde – dié riet, dié kleed, dié kroon? Boet Hy só vir my skulde, word
só Gods Seun vertoon!
Ja, ek kos Hom die slae, die smarte en die hoon.
Vir my hang Hy,
verlate en naak, met doringkroon.
Vir my was daardie
wonde, vir my moes Hy daar staan; Hy moes vir al my sonde die bitt’re kruisweg gaan.
O Jesus, Man van
smarte, o Liefde onbegrens,
Skryf diep in alle
harte die woord: “Aanskou die Mens!” O laat my nooit vergeet nie dié kroon, dié
kleed, dié riet! Geen groter troos in leed nie – dis ook vir my geskied!
DONDERDAG 9
APRIL AAN TAFEL SAAM MET JESUS
Lees Markus
14:22-25.
Terwyl hulle eet,
het Jesus brood geneem en die seën gevra. Daarna het Hy dit gebreek en vir
hulle gegee met die woorde: ‘Neem dit, dit is my liggaam.’
Toe neem Hy ‘n beker
en nadat Hy die dankgebed uitgespreek het, gee Hy dit vir hulle, en hulle het
almal daaruit gedrink.
Hy sê vir hulle:
‘Dit is my bloed, die bloed waardeur die verbond beseël word en wat vir baie
mense vergiet word.
Dit verseker Ek
julle: Ek sal nie weer wyn drink nie tot op daardie dag wanneer Ek die nuwe wyn
in die koninkryk van God sal drink.’
(tydens
hierdie meditatiewe geleentheid gaan ons nagmaal vier, so kry vóór die tyd
wyn/druiwesap en brood reg).
Beleef die verhaal
Die
nagmaal is `n sakrament met besondere betekenis. Ons gebruik en vier die
nagmaal om ons te herinner aan wat Jesus vir elkeen van ons kom doen het. Die
nagmaal bevestig God se beloftes aan ons, gee aan ons die versekering van God
se genade en herinner ons aan God se getroue liefde wat Hy onvoorwaardelik aan
elkeen van ons gee.
Die
nagmaal vertel vir ons wat Jesus gedoen het naamlik:
Hy het aan die kruis vir ons gesterf, maar het ook
opgestaan en Hy lewe.
Die brood wat ons eet, laat dink ons aan die swaarkry
en die dood van Jesus aan die kruis.
Die wyn wat
ons drink, laat dink ons aan die bloed van Jesus wat vir ons aan die kruis
gevloei het.
Wanneer ons die brood en wyn gebruik, sê ons almal saam vir die Here dankie dat ons sy
kinders is.
Ons sê ook daarmee dat ons glo dat ons almal eendag
saam met Jesus in die hemel sal wees.
Die nagmaal help ons nou al om te sien hoe lekker
dit eendag in die hemel gaan wees. Daarom is ons bly wanneer ons die nagmaal gebruik.
Ons sê ook deur die nagmaal vir die Here dankie vir
alles wat Hy vir ons doen en gedoen het.
Geloofsverklaring
Bely die volgende
woorde:
Ek glo in God die
Vader, die Almagtige, die Skepper van hemel en aarde.
Ek glo in Jesus
Christus, sy eniggebore Seun, ons Here; wat ontvang is van die Heilige Gees;
gebore is uit die
maagd Maria;
wat gely het onder
Pontius Pilatus,
gekruisig is,
gesterf het en begrawe is en ter helle neergedaal het; wat op die derde dag
weer opgestaan het uit die dode;
wat opgevaar het na
die hemel en sit aan die regterhand van God, die almagtige Vader,
vanwaar Hy sal kom
om te oordeel dié wat nog lewe,
en dié wat reeds
gesterf het. Ek glo in die Heilige Gees.
Ek glo aan ‘n
heilige, algemene Christelike kerk,
die gemeenskap van
die heiliges; die vergewing van sondes;
die opstanding van
die vlees en ‘n ewige lewe.
Amen
Betree die verhaal
Wanneer
ons die brood eet, dink ons daaraan dat Jesus vir ons aan die kruis gesterf het
en glo ons dat Hy al ons sondes weggevat het.
Eet
die brood.
Wanneer
ons die wyn drink, dink ons daaraan dat Jesus se bloed vir ons aan die kruis
gevloei het en glo ons dat Hy al ons sondes weggevat het.
Drink
die wyn/druiwesap.
Gebed…lees die volgende woorde
biddend
Here,
dankie dat ek deur die nagmaal herinner kan word aan wat U vir my aan die kruis
gedoen het. Dankie vir die offer wat U gebring het sodat ek lewe en dit in
oorvloed kan hê.
Dankie
Here dat ek, alhoewel ons as gemeente nie fisies bymekaar teenwoordig kan wees
nie, tog weet dat ek deel is van die geloofsgemeenskap van NG Overkruin
gemeente.
AMEN.
As jy van iemand in die gemeente weet wie op een of
ander manier `n krisis beleef, bel en bid vir hom/haar/hulle oor die foon of
stuur `n boodskap waarin jy vir hom/haar/hulle bid. Ons is nogsteeds saam – wel
net op ander maniere.
VRYDAG 10
APRIL JESUS STERWE
Vat `n paar
oomblikke en kyk na die volgende prentjie
Dink
na oor die volgende vrae:
Wat sien jy raak?
Wat pla jou van hierdie uitbeelding? Waarvan hou jy nie?
Wat in hierdie uitbeelding raak jou?
Lees Markus 15: 33-41
Teen twaalfuur die
middag het daar duisternis oor die hele land gekom en dit het tot drie-uur geduur.
Om drie-uur het
Jesus hard uitgeroep: ‘Eloï Eloï, lema sabagtani?’ Dit beteken: My God, my God,
waarom het U My verlaat?
Toe party van die
mense wat daar naby gestaan het, dit hoor, sê hulle: ‘Hoor daar, hy roep vir Elia.’
Een van hulle het
toe gehardloop, ‘n spons in suur wyn gesteek en dit vir Hom op ‘n stok gehou om
te drink. Hy het gesê: ‘Wag, kom ons kyk of Elia hom van die kruis kom afhaal.’
Daarna het Jesus
hard uitgeroep en die laaste asem uitgeblaas.
Die voorhangsel in
die tempel het van bo tot onder middeldeur geskeur.
Toe die offisier,
wat reg voor Jesus gestaan het, Hom die laaste asem so sien uitblaas het, het
hy gesê: ‘Hierdie man was werklik die Seun van
God.’
Daar het ook vroue
op ‘n afstand gestaan en kyk. Onder hulle was Maria Magdalena en Maria die
moeder van Klein-Jakobus en Joses, en Salome.
Toe Jesus nog in
Galilea was, het hulle oral saam met Hom gegaan en Hom versorg. Baie ander
vroue wat saam met Hom na Jerusalem toe gekom het, was ook daar.
Beleef die verhaal
Lees biddend Koos
van der Merwe se gedig:
Inkarnasie
êrens in strate van
stof êrens in stede van klip
Hy het by mense van
klei kom woon lig het met donker kom praat sondaar en Redder was saam
verlore verdwaal
het ontmoet met hoop krisis verkrummel deur krag
leuen deur die
waarheid oorwin stukkende mense het Hy verbind ek sal my lewe ook bring
ek sal kom buig
voor my Heer en aan sy voete sal rus my vind as U my red, is ek vry
rig U my op, kan ek
leef
raak met u hand
aan die stof in my.
Betree die verhaal
Neem
nou die briefie wat jy Dinsdag geskryf het en los dit by die voet van die
kruis. Los daardie dinge by die kruis en weet dat jy volkome vergewe is.
Dank
die Here vir Sy genade.
Gebed…
Here Jesus ons
bewonder U. En ons eer U, want U het ons kom red. Amen
SATERDAG 11
APRIL STIL SATERDAG
Die ritme van
vandag verskil van die vorige paar dae…
Omdat gelowiges
vandag aan Christus in die graf dink, vorm stilte `n belangrike meditatiewe
komponent van die hele dag…
Die stilte is egter
nie sonder passie nie, maar vol gespanne afwagting op die uitkoms van Christus
se worstelling met die dood…
Wat gaan gebeur…
(Onthou om `n
foto van jou Paasfeet – uitstalling vir my te stuur)
U sal my die pad van die lewe bekend maak; versadiging van vreugde is voor u aangesig, lieflikhede in u regterhand, vir ewig. Psalms 16:11
Wat het jy in hierdie grendeltyd geleer wat positief is? Wat is ons verstaan en belewing van tyd? In hierdie artikel wil ek graag jou gedagtes stimuleer om na te dink oor wat tyd vir jou beteken? Lees gerus verder deur op hierdie skakel te kliek.
In hierdie artikel gesels dr. Petrus Moolman oor die dieper betekenis van hierdie algemene uitdrukking wat ons dikwels gebruik… dis nou “hemel op aarde”. Jy kan die volledige artikel lees deur op hierdie skakel te kliek.
In hierdie artikel deel Dr. Petrus Moolman ‘n paar gedagtes oor die realiteit daarvan dat Jesus liggaamlik op aarde geleef het en wat dit dan ook vir ons beteken om deel te wees van Sy liggaam. Lees die hele artikel deur op hierdie skakel te kliek.
In hierdie artikel deel Dr. Petrus Moolman ‘n paar gedagtes oor die verskil wat geloof (en spesifiek dan geloof in die Drie-Enige God) in ‘n tyd soos hierdie in ons lewens kan maak. En miskien is dit tyd dat ons ook nuwe geloofslense sal kry om juis perspektief te kry op die tyd waarin God…
In hierdie artikel deel Dr. Petrus Moolman ‘n paar gedagtes deel oor die vraag of dit normaal is dat ‘n gelowige soms vertwyfeling ervaar in ons geloof. Kan mens begin vrae vra oor dinge wat ek tot nou altyd as vas en waar aanvaar het? Sy slotsom is dat ons verby die wasigheid van twyfel…
In hierdie artikel gesels Dr. Petrus Moolman oor vryheid en wat dit vir ons as gelowiges beteken ook nou in die COVID-19-grendeltyd. Sy slotsom is dat ons kan droom oor ‘n toekoms, aangesien ons vry ís in Christus. Lees die hele artikel deur op hierdie skakel te kliek.
Lydenstyd 2020 en Paasnaweek is agter die rug. Ons het dit oorleef en is gestimuleer deur mandjiesvol boodskappe, preke en sommer net onderlinge bemoediging. Dit is goed dat ons die Paasnaweek in afsondering kon vier. Dit het tog ‘n ander dimensie aan die lig gebring van stilword, bepeinsing en selfontdekking. Gedurende hierdie tyd het ek na…
Laai die PDF hier af. Dr Petrus Moolman reflekteer oor die betekenis daarvan om “gegrendel” te wees… In Covid-19 afsondering, April 2020 Met hierdie praatjie probeer ek sommer bietjie padlangs oor die begrip ‘betekenis’ gesels. Dit is nie nog ‘n lysie van dinge wat jy gedurende die tyd van afsondering kan doen nie. Ons hoor die begrip ‘betekenis’ of ‘betekenisvol’ nogal…
Ds. Heinrich Carstens het 6 liturgieë uitgewerk wat jy kan gebruik om saam met jou huismense ‘n huiserediens te hou. Laai Huiskerk #1 se PDF hier af. Laai Huiskerk #2 se PDF hier af. Laai Huiskerk #3 se PDF hier af. Laai Huiskerk #4 se PDF hier af. Laai Huiskerk #5 se PDF hier af….
Petrus Moolman (PhD) In Covid-19 afsondering, Maart 2020 Laai PDF dokument hier af. Sedert almal in verpligte afsondering geplaas is, word die sosiale media oorstroom met boodskappe en plasings van godsdienstige aard. Baie van hulle is kosbaar en opbouend. Ander is egter ontstellend en vir baie gelowiges verwarrend. Dit maak mense onseker in hulle geloof…